/2L ONLINE/ – Në 48-vjetorin e ditëlindjes së heroit kombëtar, Reshat Ymeri, Komuna e Gjilanit ka vënë sot gurëthemelin e bustit të tij, në lagjen ku ka lindur. Në ceremoninë e vënies së gurëthemelit, nënkryetari i Komunës së Gjilanit, Rexhep Kadriu, ka thënë se sot premtimi i kryetarit Lutfi Haziri po shkon në vend me vendosjen e këtij busti që i bënë nderë Gjilanit e Anamoravës.
“Sot po e vëmë gurëthemelin e bustit të heroit të kombit, Reshat Ymeri, ku do të bëhet edhe një park i mirë, në të cilin, mund të pushojnë pushojnë njerëzit. Pra, premtimi i kryetarit Haziri për këtë projekt po shkon në vend. Përkushtimi i qeverisjes komunale është që të nderojmë heronjtë e dëshmorët e Gjilanit dhe të kujdesemi për familjet e tyre ”, ka thënë Kadriu.
Ai paralajmëroi se shumë shpejt do të fillohet edhe me ndërtimin e “Sheshit të Ilegales” tek rruga “Abdulla Presheva”.
Ish-komandanti i zonës operative të Karadakut, Ahmet Isufi, e vlerësoi lartë vënien e gurëthemelit të heroit Reshat Ymeri.
“Unë s’kam shumë fjalë sepse vet vepra e Reshatit na ka mësuar se si duhet të jemi të përkushtuar për atdhe. E përgëzoj për punën që e ka bërë Komuna e Gjilanit. Është rast i veçantë sepse gjithmonë e mbajmë kujtimin për të”, tha Isufi.
Në emër të familjes, ka folur vëllai i heroit Reshat Ymeri, Rashiti, i cili e ka falënderuar kryetarin Haziri për realizimin e këtij projekti të rëndësishëm, duke thënë se kjo e ka nderuar gjakun e heroit dhe familjen e tij. /2L ONLINE/