Komuna e Gjilanit: Fillojnë punimet në realizimin e projektit me vlerë 2.4 milionë euro

“Kanë filluar punimet e njërit ndër projektet më të mëdha në Gjilan. Është fjala për zgjerimin e rrugës “Hamdi Kurteshi” në vlerë prej 2.4 milionë euro”, kanë thënë drejtues të Komunës së Gjilanit.

Kryetari i Gjilanit, Alban Hyseni, i shoqëruar edhe nga drejtori për Shërbime Publike, Mentor Mihovci, ai për Mbrojtje dbe Shpëtim, Bejtullah Osmani dhe përfaqësues të Forcës së Sigurisë kanë parë nga afër nisjen e punimeve.

“Projektet nga prezentimi 7 javë – 7 projekte, po marrin jetë”, tha Hyseni.

I pari i komunës tha se pas sezonit dimëror, tash janë krijuar kushtet për vazhdim të punimeve. Ky projekt është për njërën nga rrugët më të frekuentuara dhe më të rëndësishme për hyrje-dalje nga Gjilani.

“Si një nga projektet më të mëdha kapitale, ky projekt do të zgjerojë infrastrukturën e qytetit dhe do të përmirësojë dukshëm jetën e qytetarëve. Për Gjilanin që duam”, tha Hyseni.

Kryetari i Gjilanit Alban Hysen tha edhe se, punimet kanë filluar brenda kazermës së FSK për të ndërtuar murin e perimetrit të parë të sigurisë.

Sipas Hyseni në fund të muajit prill, dalin jashtë këtij perimetri dhe vazhdojnë punimet në hapësirën e jashtme.

Kjo pjesë përgjatë Kazermës së FSK-së do të ketë rrugë me katër korsi. Trotuar në dy anët. Shteg për biçikleta. Infrastrukturë nëntokësore (përfshirë edhe zhvendosjen e kabllove elektrike në kanale nëntokësore), apo mbulimi i lumit Stanishorka.  Punimet pritet të përfundohen brenda vitit 2024.

Ky projekt me bashkëfinancim me Ministrinë e Mjedisit dhe Planifikimit Hapësinor dhe Infrastrukturës ishte prezantuar me 22 janar të këtij viti, në kuadër të projekteve me moton “7 javë – 7 projekte”.

Derisa gurthemeli ishte vënë me 1 dhjetor, ku i pranishëm ishte edhe kryeministri Albin Kurti.  /2LONLINE/