Komuna e Gjilanit dhuron 32 tableta për Universitetin Publik “Kadri Zeka”

Kryetari i Komunës së Gjilanit, Alban Hyseni, ka bërë të ditur se komuna ka vazhduar mbështetjen për Universitetin Universiteti “Kadri Zeka”, duke i dhuruar 32 tableta për nevojat e institucionit të arsimit të lartë.

Hyseni njoftoi se dita ka nisur me një takim pune me përfaqësuesit e universitetit, ku është zyrtarizuar mbështetja e radhës nga komuna përmes dorëzimit të pajisjeve teknologjike.

Sipas kryetarit Hyseni, tabletat janë huazuar nga Komuna e Gjilanit për një afat të pacaktuar dhe do të shërbejnë për lehtësimin e punës kërkimore shkencore, si dhe për përmirësimin e proceseve mësimore për stafin akademik dhe studentët, transmeton 2LONLINE.

“Ky investim është pjesë e angazhimit tonë të vazhdueshëm për digjitalizimin e institucioneve dhe krijimin e kushteve sa më moderne për studime. Universiteti Kadri Zeka është një aset i rëndësishëm i Gjilanit dhe ne do të vazhdojmë të jemi partnerë në rrugëtimin e tyre drejt ngritjes së cilësisë akademike”, ka deklaruar kryetari Alban Hyseni.  /2LONLINE/