Komuna e Gjilanit dhe Policia e Kosovës forcojnë edhe më shumë bashkëpunimin për shërbime më efikase ndaj qytetarëve

Drejtori i Drejtorisë së Administratës së Përgjithshme në Komunën e Gjilanit, Elbasan Shabani, ka pritur në një takim pune përfaqësues të Njësisë për Sektor dhe Komunitete nga Policia e Kosovës, të udhëhequr nga koordinatorja Sahadete Sadiku.

Gjatë takimit, palët diskutuan për bashkëpunimin e deritanishëm ndërmjet komunës dhe policisë, i cili u vlerësua si shumë i mirë dhe me rëndësi të veçantë për ofrimin e shërbimeve ndaj qytetarëve.

“Në fokus të bisedimeve ishte edhe nevoja për vazhdimin dhe thellimin e këtij bashkëpunimi, sidomos në procesin e verifikimit të adresave”, ka thënë Shabani.

Sipas tij, një koordinim më i mirë në këtë drejtim do të ndikojë drejtpërdrejt në rritjen e saktësisë dhe efikasitetit të shërbimeve administrative.

Në përfundim të takimit, u dakordua që komunikimi dhe bashkëpunimi i ndërsjellë të vazhdojnë edhe në të ardhmen, me qëllim që qytetarët të përfitojnë shërbime më cilësore dhe më të shpejta.

“Ky takim konsiderohet si një hap i rëndësishëm drejt përmirësimit të funksionimit institucional dhe rritjes së cilësisë së shërbimeve publike në Gjilan”, ka thënë Elbasan Shabani, drejtor i Drejtorisë së Administratës së Përgjithshme në Komunën e Gjilanit.  /2LONLINE/