Komuna e Gjilanit bëhet edhe me një femër magjistër

(2L ONLINE) – Komuna e Gjilanit e ka tashmë edhe një femër tjetër me diplomë magjistrature. Ramize Ahmeti-Ibrahimi ka mbrojtur me sukses temën e magjistraturës në Kolegjin “Iliria” në Prishtinë, me titull “Njohuritë dhe qëndrimet e nënave të reja lidhur me të ushqyerit e foshnjës dhe fëmijës”.

Si magjistër e re, por si mjeke me përvojë, Ahmeti-Ibrahimi thotë se strategjia globale për të ushqyerit e foshnjës dhe fëmijës së vogël, është zhvilluar së bashku nga Organizata Botërore e Shëndetësisë (OBSH) dhe UNICEF-i, për ta rikthyer vëmendjen botërore për efektin që praktikat e të ushqyerit kanë në rritjen, zhvillimin dhe shëndetin, duke siguruar mbijetesën e foshnjave dhe fëmijëve.

Ajo thotë se mbi 50 për qind të rasteve, kequshqyeshmëria është përgjegjëse në mënyrë direkte apo edhe indirekte për vdekjen e 10.5 milionë fëmijëve brenda një viti, nën moshën 5-vjeçe. Mbi dy të tretat e këtyre vdekjeve, të cilat janë të shoqëruara me të ushqyerit e pa përshtatshëm, ndodhin gjatë vitit të parë të jetës.

Strategjia globale është dizajnuar për përdorim nga qeveritë dhe partnerët tjerë të interesuar, si grupet e punëtorëve shëndetësorë, organizatat jo qeveritare, ndërmarrjet komerciale dhe organizatat ndërkombëtare.

Strategjia ofron rekomandimet e OBSH-së dhe të UNICEF-it për të ushqyerit e përshtatshëm për foshnjën dhe fëmijën e vogël, shpjegon obligimet dhe përgjegjësitë e qeverisë dhe grupeve të interesuara si dhe përshkruan veprimet të cilat mund të mbrojnë, promovojnë dhe përkrahin nënat, për t`iu përmbajtur rekomandimeve të të ushqyerit.

Ramize Ahmeti Ibrahimi është e lindur në Gjilan. Ka kryer Fakultetin e Mjekësisë, drejtimi i përgjithshëm – në Universitetin e Prishtinës. Specializimin për Mjekësi Familjare, gjithashtu e ka kryer në Prishtinë, ku po ashtu kam vijuar Masterin në Kolegjin “Ilria”, drejtimi Menaxhment Shëndetësor dhe ka magjistruar. Është e martuar, nënë e tre fëmijëve.

Aktualisht punon në QMF “Dardania” në Gjilan. Ambiciet e saj shkencore dhe profesionale nuk përfundojnë me kaq, por janë edhe më të mëdha. /2L ONLINE/