Komuna diskuton me tregtarët për projektin për modernizimin e Tregut të Gjelbër
/2L ONLINE/ – Me iniciativën e kryetarit Lutfi Haziri, Komuna e Gjilanit e ka përgatitur një projekt ideor për modernizimin e Tregut të Gjelbër. Për t’i dëgjuar kërkesat dhe nevojat, nënkryetari Rexhep Kadriu dhe drejtori për Zhvilim Ekonomik, Ismail Januzi, kanë mbajtur sot një takim me tregtarët që punojnë në Tregun e Gjelbërt.
“Komuna e Gjilanit është në shërbimin tuaj. Kryetari Haziri e ka vullnetin për ta kryer këtë punë në mënyrë që ju të funksiononi sa më suksesshëm sepse e di që familjet tuaj varen nga puna juaj në treg”, ka thënë me këtë rast nënkryetari Rexhep Kadriu.
Tregtarët e pranishëm patën shumë pyetje, ide e propozime për projektin e modernizimit të Tregut të Gjelbër dhe nënkryetari Kadriu dhe drejtori Januzi konfirmuan se do t’i marrin të gjitha parasysh për ta bërë tregun modern, funksional dhe model./2L ONLINE/