Komuna dhe AZHR – Lindje takojnë bizneset lokale të Kamenicës

/2L ONLINE/ – Në Shtëpinë e Kulturës “Isa Kastrati”, në Kamenicë sot është mbajtur takimi me bizneset e vogla dhe të mesme, si dhe personat që janë te interesuar për hapjen e bizneseve. Pjesë e këtij takimi ishte edhe drejtoresha për Ekonomi, Zhvillim dhe Diasporë, Ferdane Rrudhani, si dhe trajneri Agim Zeka nga AZHR – Lindje.

Në këtë takim pjesëmarrësit u njoftuan rreth procedurave të cilat duhet t’i ndjekin gjatë aplikimit për grandet e financuara nga BE-ja përmes Asociacionit të Agjencive për Zhvillim Rajonal ( ARDA ) e cila ka për synim t’i ofrojë mbështetje ndërmarrjeve ekonomikisht të qëndrueshme, krijimit të vendeve të reja të punës, si dhe të ofrojë mbështetje financiare në themelimin e ndërmarrjeve të reja private, apo zgjerimin e ndërmarrjeve të vogla ekzistuese. Pjesëmarrësit në këtë takim ishin mjaft të interesuar për këtë trajnim, njëherazi parashtruan pyetje të ndryshme rreth Aplikimit për këto grande. Ndërkaq , përgjigje të detajuara morën nga trajnerët e AZHR – Lindje. /2L ONLINE/