Kompletohen çiftet gjysmëfinaliste në Ligën “Agim Ramadani”
(2L ONLINE) – Katana dhe Las Vegas kanë shkruar emrat e tyre në mesin e katër skuadrave gjysmëfinaliste. Aty i presin The Living Room dhe Vëllezërit Aliu që kishin siguruar biletat moti kohë, falë plasmanit të mirë në ligë. Megjithatë, rrugën për në finalen e madhe duhet ta kalojnë nëpërmjet këtyre dy pengesave.
Katana ka bërë përmbysje senzacionale përballë FSK-së, duke shkrirë disavantazhin prej dy golave në ndeshjen e parë. Të mbështetur nga një numër i konsiderueshëm i tifozëve Katana ka shfaqur një ndeshje të shkëlqyer dhe në fund e kurorëzoi me një triumf jashtëzakonisht me vlerë. Nga fillimi i ndeshjes e deri në fundin e saj futbollistët e kësaj skuadre shfaqën dëshirën e zjarrtë për të kaluar tutje dhe atë e arritën vetëm pas ekzekutimit të penaltive. Pas dy penaltive nga secila skuadër u përcaktua fituesi.
Las Vegas ka përsëritur formën e ndeshjes së parë ndaj Karadakut ani pse nuk ka arritur të triumfojë. Skuadra e Las Vegas hyri në këtë ndeshje me kapital nga ndeshja e parë dhe kjo bëri që të luajnë lojë më të qetë se kundërshtari. Përkundër saj edhe Karadaku pati mundësinë e rikthimit deri sa ishte duke udhëhequr në minutat e para të ndeshjes, mirëpo më pas ndeshja foli në të mirë të Las Vegasit që realizojnë edhe dy gola për të vulosur kalimin tutje drejt gjysmëfinales.
/Drilon SYLEJMANI / 2L ONLINE /
