Komiteti për Politikë dhe Financa në Kamenicë miraton shumicën e pikave të rendit të ditës

Komiteti për Politikë dhe Financa i Kuvendit Komunal të Kamenicës ka mbajtur sot mbledhjen e shtatë të rregullt të kësaj legjislature, ku janë shqyrtuar disa çështje me rëndësi për funksionimin e komunës dhe menaxhimin e buxhetit.

Mbledhjen e hapi kryesuesja e Kuvendit Komunal, Arbnore Beqiraj-Fera, e cila paraqiti rendin e ditës me shtatë pika. Anëtarët e komitetit miratuan procesverbalin e mbledhjes së kaluar, shqyrtuan Raportin Financiar Buxhetor të Komunës së Kamenicës për periudhën 1 prill – 30 qershor (TM2), si dhe diskutuan propozim-vendime që kanë të bëjnë me buxhetimin e bashkëfinancimit për asfaltimin e rrugës “Shyt Vaku”-degëzim, kompensimin e anëtarëve të komisionit komunal të aksionarëve në KRM “Higjena” dhe NPL “Dardana” SH.A., lejimin e mjeteve financiare për Kryqin e Kuq të Kosovës – Dega në Kamenicë, si dhe çështje të ndryshme.

Nga pikat e shqyrtuara, vetëm propozim-vendimi për pëlqimin paraprak dhe inicimin e procedurës së shprehjes së interesit për dhënien në shfrytëzim të pronës komunale nuk mori mbështetjen e shumicës së anëtarëve të komitetit.

Të gjitha pikat e tjera të rendit të ditës u miratuan me shumicë votash.  /2LONLINE/