/2L ONLINE/ – Komiteti për Planifikim Urban dhe Mbrojtje të Mjedisit (KPUMM) ka shqyrtuar të enjten kërkesat e KEDS-it për dhënien në shfrytëzim të pronës komunale për nevoja të ndërtimit të dy trafostacioneve dhe ka vendosur që t`i kthejë ato për trajtim në drejtorinë përkatëse, para se të bëjë rekomandimin për Kuvend Komunal.
Drejtori i Urbanizmit, Valon Shefkiu ka thënë se kërkesat e KEDS-it nuk kanë qenë paraprakisht në drejtori, por kanë ardhur drejtpërdrejt në Komitet.
Murat Hoxha, kryesues i KPUMM sqaroi se kërkesat e KEDS-it kanë të bëjë me shfrytëzimin e pronës komunale për një periudhë prej 99 vitesh, ku kjo kompani do të vendos trafo.
KPUMM shqyrtoi edhe kërkesën e noterit Fatmir Halimi, për dhënien në shfrytëzim të një hapësire komunale prej 60 metra katrorë, në rrugën “Medlin Olbrajt”, për ndërtimin e një objekti të përkohshëm dhe vendosi që ta rekomandojë në Komitetin e Pronës. Valon Shefkiu sqaroi se kërkesa është e kahershme dhe ajo nuk është përsëritur së fundi.
Njëherësh, KPUMM i kërkoi drejtorisë së Urbanizmit që planin e punës për periudhën qershor-dhjetor 2015 t`ua dorëzojë anëtarëve të kësaj trupe komunale.
Isa Shefkiu nga shoqëria civile, ka kërkuar reagimin e Inspekcionit për rrënimin e objekteve pa leje, duke filluar nga objekti i “HIB Petroll”.
Përndryshe, kryesuesi Murat Hoxha ka thënë se ai do të tërhiqet nga KPUMM, për shkak të obligimeve tjera që ka në Parlamentin e Kosovës, ku është deputet. /2L ONLINE/
/fotoilustrim/