Komisioni Qendror i Zgjedhjeve: Procesi i votimit ka nisur në të gjitha qendrat e votimit

Komisioni Qendror i Zgjedhjeve (KQZ) ka njoftuar se procesi i votimit për zgjedhjet e parakohshme për Kuvendin e Kosovës ka nisur në të gjitha Qendrat e Votimit në vend, ndërsa materiali zgjedhor, përfshirë fletëvotimet, është shpërndarë me kohë në orët e hershme të mëngjesit.

Sipas KQZ-së, votimi zhvillohet në 949 qendra të votimit në të gjithë vendin, me gjithsej 2,550 vendvotime, prej të cilave 911 qendra me 2,498 vendvotime për votimin e rregullt dhe 38 qendra, nga një për çdo komunë, me 52 vendvotime, për të mundësuar votimin me kusht.

Sipas Listës së Votuesve, numri i qytetarëve me të drejtë vote për të votuar sot në Republikën e Kosovës është 1,959,962, të cilët janë të shpërndarë në 38 komuna.

Në zgjedhje marrin pjesë 21 subjekte politike dhe 902 kandidatë për deputetë, njofton KQZ. /2LONLINE/