Komandanti i KFOR-it dhe Cliff flasin për veriun

Komandanti i KFOR-it, Gjeneral Major Francesco Paolo Figliuolo u takua sot në mëngjes me ambasadorin e Britanisë së Madhe në Prishtinë, Ian Cliff, ku u diskutua për situatën e përgjithshme të komuniteteve në Kosovë, me theks të veçantë në veri të Kosovës dhe zhvillimet e fundit politike.

Komandanti i KFOR takohet rregullisht me përfaqësuesit e komunitetit ndërkombëtar, duke përfshirë autoritetet politike, ushtarake dhe civile në Kosovë dhe në rajonin e Ballkanit, në mënyrë që të harmonizohet qasja gjithëpërfshirëse për normalizimin, përmes dialogut dhe bashkëpunimit, i marrëdhënieve në mes Prishtinës dhe Beogradit.

Komandanti i KFOR-it dhe ambasadori i Mbretërisë së Bashkuar u pajtuan për rëndësinë e përpjekjeve të KFOR-it për të kontribuuar, si reagues i tretë, në mbështetje të Policisë së Kosovës, EULEX-it dhe të gjitha organizatave vendore dhe ndërkombëtare dhe në ruajtjen e një mjedisi të qetë dhe të sigurt dhe lirinë e lëvizjes në tërë Kosovën.