Komandanti i FSK-së gjatë qëndrimit zyrtar në ShBA, realizoi vizita të rëndësishme

Në kuadër të vizitës zyrtare në ShBA, Komandanti i FSK-së, Gjenerallejtënant Bashkim Jashari, ishte i ftuar në organizimin e Konsullatës së Republikës së Kosovës në Ajova, ShBA. Me këtë rast takoi Sekretarin e Shtetit z. Paul Pate, kryetarët e qyteteve të Johnson dhe Norwalk, si dhe zyrtarë të ndryshëm të shtetit të Ajovës.

Gjeneral Jashari vlerësoi lartë bashkëpunimin dhe partneritetin, si dhe i falënderoi zyrtarët shtetëror për mbështetjen e pakursyer që po vazhdojnë të ofrojnë për Forcën e Sigurisë së Kosovës.

Gjithashtu, në kuadër të agjendës zyrtare KOMFSK vizitoi edhe shtëpinë e veteranëve të ushtrisë së SHBA-ve për këtë shtet. Gjatë kësaj vizite, GLT Jashari u njoftua nga stafi i këtij institucioni me aktivitetet, procedurat dhe rolin e rëndësishëm në mbështetje të veteranëve.

Në fund të vizitës, GLT Jashari shprehu mirënjohje për të gjithë veteranët e ushtrisë së SHBA-së, të cilët kanë kontribuar në ruajtjen e paqes dhe sigurisë nëpër botë, në veçanti atyre që kanë shërbyer në Kosovë.