KMDLNJ viziton të ndaluarit për aferën e vizave!
Monitorues të KMDLNJ-së vizituan të ndaluarit për aferën e vizave të cilët u arrestuan nga Policia e EULEX-it dhe Policia e Kosovës në orët e hershme të mëngjesit me datën 05 shkurt 2014. Të arrestuarit i deklaruan KMDLNJ-së se arrestimi i tyre është bërë duke respektuar ligjin dhe se gjatë arrestimit ndaj tyre nuk është përdorur forca fizike, nuk janë fyer dhe se është respektuar dinjiteti i tyre.
”Atyre u është treguar dhe dorëzuar vendimi për ndalim, u është treguar se mund të angazhojnë avokat dhe se deklaratat janë dhënë në praninë e avokatëve mbrojtës. Gjithashtu gjërat e konfiskuara nga policia janë regjistruar në procesverbal dhe janë nënshkruar nga të arrestuarit.
Gjatë marrjes në pyetje kanë shfrytëzuar edhe ndihmën e përkthyesve ndërsa të gjithë të arrestuarve Policia e EULEX-it dhe ajo e Kosovës u kanë mundësuar të kërkojnë ndihmën e mjekëve. Edhe në Qendrën e Ndalimit ku mund të qëndrojnë 48 orë, të ndaluarit kanë deklaruar se sjellja e oficerëve është shumë korrekte dhe se nuk kanë asnjë vërejtje.
Edhe këtu janë vizituar nga avokatët mbrojtës. Personat e ndaluar janë deklaruar se gjatë arrestimit dhe bastisjes nuk janë keqtrajtuar apo shqetësuar në asnjë formë anëtarët e familjeve të tyre.
KMDLN”vlerëson se ndaj të ndaluarve është vepruar në përputhje me të drejtat e personave të privuar nga liria”, thekson komunikata.