Klubi i Psikologjisë në Gjimnazin Natyror “Xhavit Ahmeti” – Një vit i ri, ide të reja dhe energji e freskët!
“Viti i ri shkollor nisi me entuziazëm të veçantë për Klubin e Psikologjisë, ku patëm kënaqësinë të mirëpresim shumë anëtarë të rinj, veçanërisht nxënës nga klasat e dhjeta, të cilët iu bashkuan klubit me dëshirë për të mësuar, bashkëpunuar dhe kontribuar”, thuhet në një postim të faqes zyrtare të Gjimnazit Natyror “Xhavit Ahmeti” në Gjilan.
Më tej, bëhet e ditur se në takim, së bashku me psikologen e shkollës, Kaltrina Jetishi, ishte i pranishëm edhe prof. Enver Sadiku, këshilltar për karrierë në Gjimnazin Natyror “Xhavit Ahmeti”, me të cilin u diskutua për rëndësinë e orientimit në karrierë dhe mundësitë e zhvillimit të nxënësve në këto aktivitete.
Gjatë takimit u prezantua plani i aktiviteteve të Klubit përgjatë vitit shkollor, duke përfshirë tema si Java e Psikologjisë, ndikimi i rrjeteve sociale, orientimi në karrierë, menaxhimi i stresit, vetëbesimi, empatia dhe ndikimi i krahasimit me të tjerët.
Po ashtu, u diskutuan iniciativa kreative si krijimi i podcastit të Psikologjisë, vizita edukative në institucione të ndryshme dhe projekte të tjera që synojnë të nxisin bashkëpunimin, kreativitetin dhe një mjedis shkollor më gjithëpërfshirës.
Klubi i Psikologjisë është një hapësirë ku idetë dëgjohen, mendimet respektohen dhe secili ka mundësinë të kontribuojë në krijimin e ndryshimeve pozitive. /2LONLINE/