KK Gjilan: A do të shpallen qytetarë nderi Rrustemi dhe Shaqirit?!

/2L ONLINE/ – Kuvendi Komunal i Gjilanit (pa opozitën), po diskuton rreth pikës së rendit të ditës për të shpallë “Qytetar Nderi” i Gjilanit i z. Joseph R.Biden III, z. Erzen Rrustemin dhe i Xherdan Shaqirin. Pati vërejtje për procedura teknike që nuk janë ndjekur. Po ashtu u ankua se nuk u paraqitën as të dhëna bazike për këto figura, ndonëse u tha se janë figura të njohura të dëshmuara që do e nderojnë edhe qytetin, që po i nderon me këtë çmim.

Ndonëse të pranishëm ishin anëtarë të Kuvendit nga LDK e AAK që janë partnerë koalicioni, interesant ishte fakti që kishte fërkime dhe mospajtime. Disa anëtarë të LDK-së por edhe ata të AAK-së, thanë se nuk duhet dalë që ata janë kundër këtyre figurave, sepse të gjithë i çmojnë këto personalitete, por janë vetëm kundër shkeljeve dhe mosrespektim të procedurave.

Përndryshe, derisa propozimi i parë për Joseph R.Biden III, kaloi me shumicë votash, për dy të tjerët vazhdoi diskutimi. Malazog Hoxha, drejtues i Njësisë për Sport i Komunës së Gjilanit tha se procedurat ligjore janë ndjekur deri në këtë moment për t’u shpallë qytetar nderi sportistët Erzen Rrustemi e Xherdan Shaqiri, dhe tani i takon kuvendarëve të marrin vendim.

Arben Mehmeti (LDK) ishte autokritik që është ftua si seancë e jashtëzakonshme për të shpallë dike qytetar nderi. Ai tha se duhej të respektoheshin procedurat, të kenë anëtarët e Kuvendit materiale për këto personalitete e jo vetëm Kuvendi të bëhet mekanizëm votimi.

Ndërkohë që kryesuesja Valentina Bunjaku – Rexhepi tha se në fakt seanca e jashtëzakonshme është ftuar për rendin e ditës “Propozim vendimi për rialokim te mjeteve për projekte kapitale”, por se këto pika tjera janë plotësime. Kur ajo u përpoq ta hidhte në votim këtë çështje, kuvendarët kërkonin të diskutohej akoma. Me kërkesë të Avdyl Aliut, shefit të grupit të Këshilltarëve të LDK-së, u kërkua pesë minuta pauzë për konsultime. /2L ONLINE/