KGJK ka filluar fazën e intervistimit të kandidatëve për gjyqtarë në gjykatat themelore

Këshilli Gjyqësor i Kosovës (KGJK) ka filluar sot fazën e intervistimit me gojë për 36 kandidatë, të cilët kanë kaluar me sukses testin kualifikues dhe testin me shkrim, në kuadër të procesit të rekrutimit për 15 pozita për gjyqtarë në gjykatat themelore të Republikës së Kosovës.

“Faza e intervistimit përbën një hap të rëndësishëm në procesin e përzgjedhjes, duke synuar vlerësimin e aftësive profesionale, integritetit dhe përgatitjes së kandidatëve për ushtrimin e funksionit të gjyqtarit. KGJK është e përkushtuar që ky proces të zhvillohet në mënyrë transparente, të drejtë dhe në përputhje me standardet më të larta profesionale”, thuhet në njoftim.

Në funksion të garantimit të një procedure të hapur dhe të besueshme, KGJK ka ftuar aktorët relevantë për të monitoruar procesin. Në këtë fazë, të pranishëm janë përfaqësues nga Misioni i Bashkimit Evropian për Sundimin e Ligjit në Kosovë (EULEX), Organizata për Siguri dhe Bashkëpunim në Evropë (OSBE), si dhe Instituti i Kosovës për Drejtësi (IKD). /2LONLINE/