KGJK dhe GIZ diskutojnë për thellimin e bashkëpunimit

Zëvendëskryesuesja e Këshillit Gjyqësor të Kosovës (KGJK), Arjeta Sadiku, së bashku me Drejtorin e Përgjithshëm të Sekretariatit të KGJK-së, Shkëlzen Maliqi, pritën sot në takim menaxheren e projektit për “Mbështetje të procesit të reformës për integrimin e Kosovës në BE”, Karin Pluberg, të Shoqërisë Gjermane për Bashkëpunim Ndërkombëtar (GIZ) në Kosovë.

Në kuadër të këtij takimi, u trajtuan mundësitë konkrete të bashkëpunimit, si dhe prioritetet dhe nevojat e sistemit gjyqësor në të ardhmen, me theks të veçantë në mbështetjen e reformave dhe rritjen e efikasitetit institucional.

Palët theksuan rëndësinë e bashkëpunimit të ndërsjellë dhe shkëmbimit të përvojave për identifikimin e fushave konkrete ku mund të ofrohet mbështetje e mëtejshme për sistemin gjyqësor.

Gjithashtu, përfaqësuesit e KGJK-së shprehën gatishmërinë për thellimin e bashkëpunimit me GIZ-in, në funksion të forcimit të sundimit të ligjit, avancimit të reformave në drejtësi dhe përmbushjes së standardeve në kuadër të procesit të integrimit evropian. /2LONLINE/