Kërkesat e studentëve duhet të përkrahen

(2LONLINE) – Kërkesat e studentëve të cilat po ndodhin këtyre ditëve për shkak të dyshimeve për keqpërdorime finansiare në UP si dhe dhënien e diplomave me të holla, po qese janë kërkesa të pa politizuara, ato duhet të përkrahen fuqishëm. Dhe, minimumi i plotësimit të këtyre kërkesave do duhej të ishte dorëheqja e rektorit dhe gjithë atyre që kanë bërë keqpërdorime financiare ose të çfarëdo lloji tjetër qofshin ato, sepse njollosja dhe degradimi i tempullit të diturisë, siç është UP, i cili në rrethanat okupuese ia doli t’i mbijetoi dhunës dhe terrorit serb, është gjëja më e keqe që mund t’i ndodhë Kosovës në kohën kur aspiratat e shqiptarëve janë të drejtuara kah anëtarësimi sa më i shpejt i tyre në BE dhe struktura tjera evropiane dhe ndërkombëtare.

Tani më janë bërë të tepërta dhe shumë të padurueshme skandalet dhe aferat e njëpasnjëshme që e kanë goditur Kosovën pas luftës çlirimtare, madje i kanë kapërcyer gjitha normat ligjore dhe morale të shoqërisë sonë, duke arritur kulmin në dëmtimin e imazhit të shtetit të Kosovës në arenën ndërkombëtare. Kështu që, është koha e fundit për largimin e atyre të cilët me vite i kanë keqpërdorë pozitat e tyre shtetërore dhe qeverisëse, duke ushtruar diktat politik në të gjitha institucionet shtetërore dhe OJQ-të e pavarura, dhe ç’është edhe më e papranueshmja, duke ushtruar ndikim politik mbi institucionin më të shenjtë arsimor të Kosovës, siç është Universiteti i Prishtinës..!

Mërgata politike dhe ekonomike gjithnjë ka qenë në përkrahje të kërkesave të studentëve, sepse ata kanë qenë zëri i rinisë sonë si dhe shtresa më vitale e kombit, përfshirë brezat e tanishme të cilat, për fat të mirë, po rriten në Kosovën e lirë dhe të pavarur. Këto gjenerata e kanë merituar të rritën dhe arsimohen të lira dhe të çliruara nga të gjitha hipotekat e të kaluarës, ndaj si të këtilla nuk durojnë më që të edukohen në mjedise ku lulëzon korrupsioni, nepotizmi, falsifikimet dhe plagjiatët e shumta në fushën e diturive dhe shkencave shqiptare, ngase nuk e lejojnë më vrasjen e ardhmërisë së tyre.

Prandaj, është e natyrshme që studentet tanë duan të jetojnë të barabartë dhe krahas me popujt e civilizuar të kontinentit që i takojnë. Dhe, për hir të së ardhmes së tyre gjesti më normal do të ishte tërheqja e zotni Gashit që t’i hapë rrugën luftës kundër dukurive negative të cilat e kanë kapluar, jo vetëm Universitetin, por të gjitha segmentet e shtetit dhe shoqërisë kosovare..!?

/Hafiz Gagica/