KDS realizon kursin e avancuar për snajper

Në Komandën e Doktrinës dhe Stërvitjes (KDS) në Ferizaj, ka përfunduar me sukses kursi i avancuar për snajper, për gjeneratën e dytë të këtij viti.

Kursi kishte për qëllim avancimin e aftësive profesionale të pjesëtarëve në fushën e qitjes me snajper, si dhe zhvillimin e shkathtësive për vëzhgim dhe mbledhje të informacioneve në zona me rrezikshmëri të lartë.

Trajnimi u realizua nga instruktorët e Qendrës së Stërvitjes Profesionale në KDS, përmes aktiviteteve teorike dhe praktike, të zhvilluara në ambientet e KDS-së dhe në Poligonin Ushtarak në Babaj të Bokës, në Gjakovë.

Gjatë realizimit të kursit, pjesëmarrësit zhvilluan shkathtësitë e tyre profesionale në qitje në distanca të gjata, duke u trajnuar në përdorimin e sistemeve të ndryshme të armëve dhe kalibrave përkatës.

Përmes këtij kursi, Forca e Sigurisë së Kosovës vazhdon të investojë në ngritjen e kapaciteteve profesionale dhe avancimin e përgatitjes ushtarake të pjesëtarëve të saj, në funksion të përmbushjes së misionit dhe detyrave të saj. /2LONLINE/