/2L ONLINE/ KDI ka shtuar edhe një shërbim që ka për qëllim të ndihmoj dhe këshilloj denoncuesit në luftën kundër korrupsionit, si dhe dëshmitarët e viktimat e korrupsionit në Kosovë, nëpërmjet të cilit shërbim ata mund të përfitojnë asistencë ligjore pa pagesë në ndërtimin e dosjes së tyre, nga avokati i angazhuar në KDI.
Kështu thuhet në një njoftim të kësaj organizate, për të shtuar se, ata që duan të raportojnë këto raste KDI ka siguruar linjën telefonike 0800 77 777 pa pagesë (nga operatori VALA), ku viktimat e korrupsionit mund të marrin këshilla fillestare për të drejtat e tyre, dhe në qoftë se ekziston dëshmia e korrupsionit, vazhdohet me konsultime ligjore të mëtejshme. Denoncuesit gjithashtu mund të shkruajnë në adresën elektronike [email protected].
“Të gjitha thirrjet trajtohen me besueshmëri nga ana e KDI-së. Me kërkesë të ankuesit thirrjet edhe mund të mbesin anonime. Por, për të ndërmarrë veprime ligjore për të ndihmuar personat që janë viktima apo denoncues të korrupsionit, është e nevojshme që të jemi në posedim të të dhënave të raportuesit.
Pasi që të raportohet rasti, atëherë zyrtari ligjor bën analizimin e rastit dhe i ofron asistencë teknike ligjore në artikulimin, zhvillimin dhe parashtrimin e ankesës në adresën e duhur”, thuhet me tej në njoftimin e KDI-së.
Rastet që janë raportuar deri më tani, janë shqyrtuar nga ana e zyrtarit ligjor, dhe kanë proceduar tutje nëpër adresat adekuate sipas raportimit të bërë nga denoncuesit. Nga to vlejnë të përmenden:
anulimi i një tenderi në një ministri si dyshim i kurdisjes së tij;
vënia nën hetime e tre tenderëve të përzgjedhur me procedurë të kuotimit;
kontaktimi i organeve kompetente për rastet e moszbatimit të të drejtave të punëtorëve (rasti në vijim);
përgatitja e shkresave zyrtare për ankesë ndaj institucioneve publike për moskryerjen e punëve në shërbim të qytetarëve.
“Për të gjithë personat që dëshirojnë të përdorin formën e kontaktit të drejtpërdrejtë me këshilltarin ligjor për të denoncuar ndonjë rast atë mund ta bëjnë edhe në qytetin e Gjilanit. Këshilltari ligjor do të jetë në dispozicion për të gjithë të interesuarit me datën 18 Shtator 2015 nga ora 10:00 deri në ora 16:00 në zyret e organizatës “KCIC” që gjenden në adresën Rr. “Rexhep Dajkovci”- Nr:48, (përballë hotel Kristal).
Denoncimi mund të bëhet në çdo kohë edhe në numrin 0800 77 777 apo në [email protected]. /2L ONLINE/