KB Drita: Na ndihmoni të mbesim në elitë

(2L ONLINE) – Vendimi i Bordit të FBK-së për mos përfshirjen e skuadrës së Dritës në garat e sivjetme, ka krijuar panik në kampin gjilanas që kërkojnë ndihmën e Drejtorisë së Sportit për ta paguar kuotacionin për licencim.

Si rrjedhojë e ngjarjeve të fundit, Drejtori i skuadrës së Dritës, Fazli Fazliu ende shpreson se skuadra e tij do të arrij t’i përmbushë kriteret për licencim si dhe të jenë pjesë e Superligës edhe në edicionin e ardhshëm pasi skuadra gjilanase ka ende se çfarë ti japë basketbollit kosovar.

“Nuk jemi përjashtuar, mirëpo na është dhënë vërejtje për mospërmbushjen e obligimeve ndaj FBK-së, dhe ne jemi ne pritje nga DKRS-ja, të na ndajnë mjetet që na takojnë. Ne kemi bërë kërkesën zyrtare për lirimin e mjeteve tash ju mbetet atyre sa kanë vullnet të na ndihmojnë”, u shpreh Fazliu, për Portalin 2L ONLINE.

Ai insiston në marrjen e mjeteve pasi sipas tij të gjitha klubet e tjera në Gjilan janë ndihmuar pos klubit të basketbollit “Drita”. Përkundër gjithë kësaj tollovie, Fazliu beson se skuadra e tij do të jetë pjesë e elitës së më të mirë në basketbollin e vendit tonë.

“Ne do të vazhdojmë të jemi pjesë e Basketbollit dhe do të mundohemi ta bëjmë më të mirën për Basketbollin e Qytetit edhe pse jemi shumë të zhgenjyer nga bizneset e qytetit të cilët nuk mendojnë aspak për rininë tonë dhe për një klub, i vetmi në Anamoravë që nuk ndihmohet nga bizneset”, thekson Fazliu.

Kujtojmë se Drita garoi me sukses në edicionin e fundit të ETC Superligës, duke u renditur e pesta në klasifikim dhe pse gjatë gjithë kohës ishte pretendente për inkuadrim në play-off. Me gjithë angazhimin e zyrtarëve të klubit duke sjellë basketbollistë të huaj dhe duke inkuadruar talentët e akademisë së klubit, Drita kërkon edhe një mundësi që stinorin e ardhshëm të jenë sërish pjesë e elitarëve.

/Drilon SYLEJMANI/ 2L ONLINE/