Ismet Hashani, zëdhënës i Policisë së Kosovës (PK), në Drejtorinë Rajonale në Gjilan ka bërë me dije se policia e Kosovës në Gjilan ka arrestuar dy persona, për një rast “Vjedhje e rëndë”.
“Me 04 shkurt 2020, rreth orës 21:20, këtu në Gjilan, në Rr. “Mulla Idrizi” , nga ana e policisë së Kosovës stacioni policor i Gjilanit janë arrestuar dy të dyshuar shqiptar shtetas të Kosovës, viti i lindjes (2000) dhe (2001) , për një rast “Vjedhje e rëndë’’”, ka thënë Hashani.
Sipas tij, të njëjtit janë kapur në flagrancë derisa ishin duke kryer vjedhje të kabllove nga një automjet i parkuar i tipit “Furgon” pronë e ankuesit , shqiptar shtetas i Kosovës, derën e të cilit dyshohet se e kanë hapur me forcë.
“Këta të dyshuar së bashku edhe me dy të dyshuar tjerë të cilët për momentin gjenden në arrati, (të njohur për Policinë), dyshohet se tek vendi i njëjtë kanë kryer edhe dy raste tjera të “vjedhjeve” të kabllove ku vlera e përgjithshme e dëmit sipas ankuesit është e konsiderueshme”, ka thënë zëdhënësi Hashani.
Të dyshimtit janë intervistuar në prani të avokatëve mbrojtës.
Me vendim të Prokurorit të dyshuarit janë ndaluar në mbajtje për 48 orë. Rasti është duke u hetuar.
