Kamenicë: Transporti i nxënësve drejt riorganizimit

“Në Kamenicë, përmirësimi i transportit të nxënësve po trajtohet si një nga prioritetet kryesore nga Drejtoria e Arsimit, me synim rritjen e cilësisë së shërbimeve dhe sigurimin e qasjes së barabartë në arsim”, thonë drejtuesit e Drejtorisë Komunale të Arsimit.

Drejtori i Drejtorisë së Arsimit, Selami Klaiqi, së bashku me stafin e tij, kanë zhvilluar një takim pune ku është diskutuar në detaje për organizimin aktual të transportit dhe nevojën për përmirësime konkrete.

Gjatë këtij takimi u bë e ditur se nga muaji shtator pritet një riorganizim i linjave të transportit, me qëllim rritjen e efikasitetit dhe mbulimin më të mirë të nevojave të nxënësve në të gjitha zonat e komunës.

Në fokus të diskutimeve ishte edhe rritja e nivelit të sigurisë gjatë transportit, si dhe garantimi i barazisë sociale, duke mundësuar që çdo nxënës të ketë qasje të barabartë në arsim, pavarësisht vendbanimit apo kushteve ekonomike.

Po ashtu, u theksua rëndësia e lehtësimit të barrës financiare për familjet, përmes ofrimit të një sistemi transporti më të organizuar dhe funksional.  /2LONLINE/