Kamenicë: Rendimentet e këtij viti konsiderohen të kënaqshme

Drejtoria e Bujqësisë, Pylltarisë dhe Zhvillimit Rural e Komunës së Kamenicës njofton se fushata e korrje-shirjeve në Komunën e Kamenicës ka filluar më 11 korrik 2026, fillimisht me korrjen e sipërfaqeve të mbjella me elb, ndërsa nga 14 korriku 2026 ka nisur edhe korrja e grurit.

Këtë vit, fillimi i procesit është shtyrë për disa ditë krahasuar me vitin e kaluar, për shkak të përmbajtjes më të lartë të lagështisë në kulturat bujqësore, sipas informatave të marra nga fermerët dhe kombajnerët.

Sipas planifikimeve, gjatë kësaj fushate pritet të korren:

• 1,250 hektarë me grurë;

• 70 hektarë me elb;

• 100 hektarë me tërshërë;

• 50 hektarë me tritikale.

Në proces janë angazhuar 29 autokombajna, të cilat paraprakisht kanë kaluar pranimin teknik dhe janë pajisur me lejet përkatëse nga Komisioni Komunal për Korrje-Shirje.

Deri më tani janë korrur:

• 688 hektarë grurë (rreth 55% e sipërfaqes së planifikuar);

• 66 hektarë elb (rreth 95% e sipërfaqes së planifikuar).

Komisioni Komunal për Korrje-Shirje është duke monitoruar nga afër ecurinë e procesit, duke i kushtuar vëmendje të veçantë minimizimit të humbjeve gjatë korrjes, ruajtjes së rendit në terren dhe zbatimit të masave parandaluese kundër zjarreve.

Sipas të dhënave nga terreni, rendimentet e këtij viti konsiderohen të kënaqshme. Në disa parcela janë regjistruar rendimente mbi 4,000 kg/ha, ndërsa mesatarisht rendimentet sillen:

• Gruri: 3,500–4,000 kg/ha;

• Elbi: 3,000–3,500 kg/ha.

Megjithëse në disa zona ka pasur ndërprerje të përkohshme për shkak të reshjeve të shiut, kushtet klimatike në përgjithësi kanë qenë të favorshme për zhvillimin e fushatës.

“Drejtoria e Bujqësisë, Pylltarisë dhe Zhvillimit Rural dhe Komisioni Komunal për Korrje-Shirje mbeten të përkushtuar në zbatimin e Rregullores Komunale për korrje-shirje dhe në mbështetjen e fermerëve, me synim që kjo fushatë të përfundojë me sukses dhe pa incidente”, thuhet në njoftimin e Komunës.

Procesi i korrje-shirjeve në Komunën e Kamenicës është duke vazhduar.  /2LONLINE/