Kamenicë: Aksion i përbashkët për shënimin e Ditës Botërore të Pastrimit

Me rastin e Ditës Botërore të Pastrimit, Komuna e Kamenicës, në bashkëpunim me Ndërmarrjen Publike dhe Policinë, ka organizuar një aksion të përbashkët për pastrimin e hapësirave publike dhe ndërgjegjësimin për rëndësinë e mbrojtjes së mjedisit.

Pjesë e këtij aktiviteti ishte edhe drejtori i DSHPAIE-së, Zotrim Kastrati, së bashku me stafin e tij, të cilët iu bashkuan aksionit dhe kontribuan në angazhimin e përbashkët për ruajtjen e pastërtisë dhe krijimin e një mjedisi më të shëndetshëm.

Një kontribut të veçantë në këtë iniciativë ka dhënë edhe Drejtoria e Arsimit, përmes përfshirjes së shkollave, ku nxënësit kanë realizuar aktivitete pastrimi në ambientet shkollore dhe në lokalitete të ndryshme.

Përfshirja e nxënësve në këtë aksion përçon një mesazh të rëndësishëm për kujdesin ndaj mjedisit dhe edukimin e brezave të rinj me ndjenjën e përgjegjësisë qytetare.

Ky aktivitet dëshmon se bashkëpunimi ndërmjet institucioneve dhe komunitetit është thelbësor për ruajtjen e hapësirave të përbashkëta dhe promovimin e një kulture të qëndrueshme të pastërtisë.

“Komuna falënderon të gjithë pjesëmarrësit për angazhimin dhe kontributin e tyre në shënimin e Ditës Botërore të Pastrimit”, thuhet në fund të njoftimit.  /2LONLINE/