Kamenica shembull për tolerancë

/2L ONLINE/ – Kryetari i Komunës së Kamenicës, Begzad Sinani është takuar me zyrtaren e UNDP-së, Alexandra Meierhans dhe bashkëpunëtorët e saj, e ku në këtë takim ishin edhe përfaqësuesit e bashkësive fetare islame dhe ortodokse, Policisë së Kosovës, dhe të EULEX-it. Temë diskutimi ishte prezantimi i projektit, Ngritja e Besimit përmes Mbrojtjes Kulturore në Kosovë, për të cilin projekt, Komisioni Evropian ka siguruar mjetet që kapin shumën. 1,560,000.00 ero. Të pranishmit u informuan gjerësisht se si duhet të konkurroj komuna me dy projekte nga dy bashkësitë fetare, që kanë të bëjnë intervenime në objektet fetare renovime, apo zonat e këtyre objekteve.
Kryetari i Komunës së Kamenicës, Begzad Sinani ka thënë se marrëdhëniet e mira ndëretnike, në rend të parë janë meritë e vet qytetarëve të kësaj komune, të cilët kanë vendosur për të jetuar bashkërisht. Po ashtu është edhe meritë e prijësve fetar që me besimtarët e tyre e kanë kultivuar tolerancën.

Të pranishmit i përshëndeti edhe kryetari i KBI i Komunës së Kamenicës Bejtulla Hashani dhe prifti i kishës së Kamenicës Dragisha Jeriniq.

“Në këto hapësira kanë jetuar së bashku këto komunitete, që shumë rrallë kanë pasur probleme mes vete. Problemet tona, janë vetëm të natyrës ekonomike: nuk mund të gjesh shembull të tillë diku tjetër sikurse në Kamenicë, ku tregu është përbashkët dhe fëmijët e komuniteteve të ndryshme merren së bashku me aktivitete sportive”, ka thënë Jeriniq.

Dy bashkësitë fetare ishin dakord, për një projekt te parku i qytetit, i cili gjendet afër dy objekteve fetare, kishës dhe xhamisë, si dhe tregut të qytetit. /2L ONLINE/