Kamenica, komunë ku po anulohen konkurse e tendere!
Inspektorati regjional i Arsimit ka marrë vendim për anulimin e pranimit të mësimdhënësve të gjuhës angleze, si dhe ka kërkuar t’u anulohen kontratat mësimdhënësve Donjeta Latifaj dhe Denis Kastrati. Në arsyetimin e vendimit, të cilin ka arritur ta sigurojë KamenicaPress thuhet:
“Nuk është respektuar konkursi I datës 4 nëntor 2015. Në konkurs është shpallur një vend i lirë për mësimdhënës të gjuhës angleze me 20 orë, ndërsa Drejtoria e Arsimit në Kamenicë ka pranuar 2 mësimdhënës me nga 10 orë. Me këtë rast, DKA Kamenicë ka bërë shkelje ligjore të konkursit”, thuhet në arsyetim.
Përndryshe, sipas KamenicaPress, Komuna e Kamenicës vlerësohet ndër komunat kampion për anulim të konkurseve dhe tenderëve, për shkak të gjetjes së parregullsive dhe shkeljeve ligjore. Komisioni i Pavarur Mbikëqyrës ka anuluar dhjetëra konkurse në këto dy vjet e gjysmë të qeverisjes së Begzad Sinanit.
