Ka ndërruar jetë Nexhmedin Ymeri, lë pas një kontribut të çmuar në gazetari, publicistikë dhe fushën e kulturës në përgjithësi

Ka ndërruar jetë në moshën 77-vjeçare, gazetari Nexhmedin Ymeri, duke lënë pas një trashëgimi të çmuar profesionale dhe njerëzore.

Lajmi për vdekjen e tij është bërë i ditur nga familja, e cila përmes një njoftimi ka shprehur dhimbjen e thellë për humbjen e më të dashurit të tyre.

“Me dhimbje të thellë njoftojmë familjarët, miqtë dhe dashamirët se sot, më 14.07.2026, pas një beteje me sëmundjen, ndërroi jetë babai ynë i dashur, Nexhmedin Ymeri. Me fjalë nuk mund të përshkruhen veprat dhe mirësia jote. Ato do të mbeten dëshmia më e bukur e jetës që ke jetuar. Të qoftë i lehtë dheu i Kosovës. Allahu të mëshiroftë dhe të shpërbleftë me Xhenetin Firdeus”, thuhet në njoftimin e familjes.

Sipas njoftimit, ceremonia e varrimit do të mbahet nesër, pas namazit të ikindisë, në orën 16:30.

Kontributi i Nexhmedin Ymerit në gazetari ka qenë i madh, duke përfshirë atë shumëvjeçar në Radio Gjilan (që nga fillim 1974), por edhe në mediume tjera, gazeta ditore, periodike, por edhe në mediumet lokale, Radio e TV, ndërsa poashtu i çmuar ka qenë kontributit i tij edhe në Teatër. Edhe ky institucion e ka marrë me pikëllim të thellë këtë lajm mortor.

Në njoftimin e Teatrit thuhet:

Me pikëllim të thellë morëm lajmin për ndarjen nga jeta të gazetarit, publicistit dhe njeriut të kulturës, Nexhmedin Ymeri, i cili me përkushtimin, profesionalizmin dhe dashurinë e tij la gjurmë të pashlyeshme në jetën kulturore të Gjilanit.

Teatri i Gjilanit shpreh pikëllimin e thellë për ndarjen nga jeta të Nexhmedin Ymerit, gazetarit, publicistit dhe njeriut të çmuar të kulturës së Gjilanit.

I ndjeri ishte për shumë vite pjesë e Teatrit të Gjilanit, ku punoi me përkushtim deri në pensionimin e tij, duke dhënë një kontribut të vyer në jetën artistike dhe institucionale të teatrit tonë. Me profesionalizmin, urtësinë dhe dashurinë e tij për kulturën, ai fitoi respektin e kolegëve, artistëve dhe gjithë komunitetit.

Largimi i tij është një humbje jo vetëm për familjen dhe miqtë, por edhe për gjithë jetën kulturore të qytetit.

Në emër të kolektivit të Teatrit të Gjilanit, u shprehim ngushëllimet më të sinqerta familjes Ymeri, të afërmve, miqve dhe të gjithë atyre që e njohën dhe e vlerësuan.

Qoftë i përhershëm kujtimi për Nexhën!