Jemi bashkë, jemi të barabarta

Manifestimi i së shtunës do të jetë madhështor pikërisht sepse pjesëmarrja e grave do të jetë e madhe, thuhet në një njoftim të subjekteve opozitare.

Thirrja për pjesëmarrjen e grave në manifestimin e 28 nëntorit u bë nga tubimi mobilizues me gra e vajza ku folën nënkryetarja e Kuvendit të Republikës nga VETËVENDOSJE! Aida Dërguti, deputetja e Aleancës për Ardhmërinë e Kosovës Teuta Haxhiu, Selvije Rexhepi nga NISMA e po ashtu Nazlie Bala, aktiviste e Lëvizjes VETËVENDOSJE!

“Do të jemi bashkë, do të jemi të barabarta dhe aty ku do e kërkon sovraniteti do të marrim pjesë masivisht”, tha Nazlie Bala. Ndërkaq, deputetja Haxhiu tha se manifestimi do të jetë paqësor. “Jemi mbledhë dhe do të mblidhemi sa herë të jetë e nevojshme në mbrojtje të Republikës”, tha Haxhiu para pjesëmarrësve të shumta në Prishtinë duke i ftuar që të vinë me shumë të tjera të shtunën më 28 nëntor, në orën 14:00. Më tej në tubim u tha se marrëveshja për “Zajednicën” dhe ajo për demarkacionin me Malin e Zi nuk mund të kalojnë sepse Kosovës i shkaktojnë një dëm të parikuperueshëm.

Sikur Haxhiu, edhe Selvije Rexhepi tha se do të marrë pjesë me familjarë nesër në manifestim. “Nesër në orën 14:00 të manifestojmë sepse këto marrëveshje nuk guxojnë të kalojnë. Të manifestojmë denjësisht ashtu siç rezistuan deputetët për Republikën”, tha Rexhepi.

“Meqë historikisht padrejtësisht gratë u përjashtuan nga sfera publike ka ardhur koha që me një hap gjigant ta përmbysim këtë rend. Nesër do të jemi aty të gjitha”, tha deputetja Dërguti.

Në këtë tubim u bë thirrje edhe për lirimin e deputetes Donika Kadaj – Bujupi dhe ndalimi i përndjekjes së deputetes Albulena Haxhiu.