Java e minatorit të Trepçës dhe e Trepçës së minatorit

Sot fillon Java e Minatorit në Kosovë. Kjo është data kur në vitin 1989 minatorët Trepçës kishin filluar grevën në minierat e Trepçës, për t’i kundërshtuar amandamentimet kushtetuese që atëbotë përgatiteshin për t’ia suprimuar autonominë Kosovës dhe për ta nisur kështu procesin e pushtimit klasik të Kosovës nga Serbia dhe apart’heidit, thuhet në një komunikatë të lëvizjes Vetëvendosje

Më tej thuhet:

“Kjo pastaj rezultoi në përjashtimin fillimisht të të gjithë punëtorëve shqiptarë nga puna, përjashtimin e shqiptarëve nga sfera publike, përndjekjen e vazhdueshme dhe të egër të shqiptarëve nga forcat policore të Serbisë, shpërnguljen e shqiptarëve dhunshëm nga Kosova, shkatërrimin e potencialit industrial të vendit, uzurpimin e Trepçës dhe eksploatimin e egër të saj financiar e minerar për t’i financuar luftërat e Serbisë, plaçkitjen e pasurisë publike, shoqërore e private të shqiptarëve të Kosovës, për të kulmuar me masakrat gjenocidale e dëbimin e dhunshëm të afër 1 milionë shqiptarëve nga Kosova gjatë luftës.

Në javën e parafundit të janarit të vitit 2015, minatorët prapë hyrën në grevë, prapë në minierat e Trepçës. Tash kërkonin shndërrimin e menjëhershëm të Trepçës në ndërmarrje publike. Kështu Trepça do ta merrte statusin e saj të merituar ligjor e ekonomik për t’u shndërruar në shtyllë qendrore të zhvillimit ekonomik e industrial të vendit, dhe për t’u vendosur në funksion të së mirës së përgjithshme dhe mirëqenies së qytetarëve. Sikur atëherë, edhe tash minatorët po e dinë se çka është mirë. Por sikur atëherë edhe tash pushteti nuk po i dëgjon.

Trepça e ndarë në dysh është e tillë për shkak të konjukturave politike të cilat qeverisin në Kosovë. Për të njëjtën arsye që Mitrovica është e ndarë dhe e mban edhe Kosovën të ndarë në dysh. Kosova mbahet e ndarë për ta mbajtur të ndarë Trepçën. E Trepça mbahet e ndarë për shkak se Kosova është e ndarë. Ndarja nuk është e mirë për Trepçën. Rrjedhimisht nuk është e mirë as për Mitrovicën, Kosovën, e as për Republikën.

Më 1989 minatorët kundërshtonin suprimimin e autonomisë. Sot ata me kërkesën e tyre për Trepçën ndërmarrje publike po kërkojnë afirmimin dhe sovranizimin e Republikës. Më 1989 greva e minatorëve organizoi demonstratat e mëdha popullore dhe organizimin shoqëror të shqiptarëve të Kosovës.

Sot e kujtojmë atë moment lavdie politike e shoqërore të minatorëve. Por minatorët e organizuar nuk mund t’i kuptojmë pa e kuptuar dhe mbështetur kërkesën e tyre. Kërkesa e tyre sot është Trepça ndërmarrje publike. Kjo është kërkesa që ne e mbështesim dhe për të cilën angazhohemi.”