Java e 34-të jo e mirë për skuadrat gjilanase, humbën edhe Drita edhe Gjilani

Java e 34-të e Superligës së Kosovës në Futboll doli të jetë fatkeqe për dy skuadrat gjilanase që luajnë në elitën e futbollit kosovar, pasi edhe njëra edhe tjetra humbën ndaj kundërshtarëve të tyre.

Drita humbi nga Dukagjini (2:0), por se javë më parë, skuadra gjilanase veçse e kishte siguruar titullin e kampionit, prandaj kjo humbje nuk ndikon gjë, ndërsa për Gjilanin humbja nga Llapi (1:2) mund të vlerësohet më e rëndë, sepse rrezikon të zbret në pozitën e barazhit, aq më tepër kur nga ai pozicion po mundohet të largohet pikërisht Llapi.

Aktualisht, Gjilani është i gjashti në tabelë me 45 pikë, Drenica e shtata me 44 pikë dhe Llapi me 43 pikë ndodhet në pozitën e tetë, atë të barazhit.

Gjithsesi, janë edhe dy ndeshje deri në përmbyllje të edicionit. Drita e ka komoditetin për të “eksperimentuar”, me sisteme lojrash apo për të angazhuar edhe lojtarë me më pak minutash lojë apo dikë edhe nga grupmoshat e reja. ndërsa Gjilani,  patjetër duhet të merr pikë për ta shmangur barazhin. 

Gjilani, në dy ndeshjet e mbetura do të luaj kundër Dritës, kampionit dhe kundër Prishtinës së Re, që veçse është përshëndetur nga Superliga. /2LONLINE/