(2LONLINE) – Drejtoria për Zhvillim Ekonomik dëshiron të sqaroj publikun se pas takimit me përfaqësues të kompanisë “EcoHigjiena” më 4 mars 2014, u dakorduam për ndërprerjen e pilot projektit të kompanisë “EcoHigjiena”, e cila për gati dy muaj ka nisur implementimin, duke ua tërhequr mbeturinat qytetarëve të “Dardanisë” dhe “Dheut të Bardhë” një herë në dy javë.
Ismail Januzi, Drejtor i Drejtorisë për Zhvillim Ekonomik ka thënë se me iniciativën e Drejtorisë është ndërprerë ky pilot projekt, pas peticionit të qytetarëve të këtyre lagjeve drejtuar Zyrës së kryetarit të Komunës, për shkak se nuk ua ka përmbushur nevojat e qytetarëve.
“Projekti i “EcoHigjienës” nuk ka rezultuar të jetë i suksesshëm, siç është proklamuar nga drejtues të saj, prandaj e kemi kthyer në gjendjen e mëparshme dhe që nga data 10 mars 2014 mbeturinat e këtyre dy lagjeve tërhiqen çdo javë”, ka thënë Januzi.
Sipas tij, Drejtoria për Zhvillim Ekonomik do të vazhdoj të jetë në mbikëqyrje të kompanive publike për të ofruar shërbime sa më cilësore ndaj qytetarëve të Komunës së Gjilanit./2llonline/
