Jahjaga priti Ministrin e Mbrojtjes së Kroacisë, Josip Buljeviç

Presidentja e Republikës së Kosovës, zonja Atifete Jahjaga, priti në takim Ministrin e Mbrojtjes së Kroacisë, zotëri Josip Buljevic. Presidentja Jahjaga me ministrin Buljevic biseduan për bashkëpunimin midis institucioneve të sigurisë dhe të mbrojtës të Republikës së Kosovës dhe atyre të Republikës së Kroacisë. Me këtë rast Presidentja Jahjaga çmoi lart bashkëpunimin e deritanishëm midis dy vendeve në këtë fushë dhe shprehu gatishmërinë për thellimin e mëtejmë të tij në interes të paqes, sigurisë dhe stabilitetit rajonal dhe global.
Presidentja Jahjaga e falënderoi ministrin Buljevic për ndihmën dhe mbështetjen e vazhdueshme që Republika e Kroacisë u ka dhënë proceseve nëpër të cilat ka kaluar Kosova, me theks në bashkëpunimin që ka pasur ministria që ai drejton me Ministrinë e Forcës së Sigurisë, si dhe bashkëpunimin midis Forcave të Armatosura të Republikës së Kroacisë dhe Forcës së Sigurisë së Kosovës.

Ministri i Mbrojtjes së Kroacisë, zotëri Josip Buljevic theksoi përkushtimin e Qeverisë së Kroacisë për të vazhduar mbështetjen dhe për të thelluar bashkëpunimin me institucionet mbrojtjes dhe të sigurisë në Republikën e Kosovës.