Jahjaga në Jordani në Samitin Global të Grave

Ish presidentja e Kosovës, Atifete Jahjaga, ndonëse jo më në funksionin e saj të mëhershëm po e vazhdon aktivitetin politik, kësaj radhe duke marrë pjesë në Samitin Global të Grave në Parlamente “Gratë në Politikë, që po mbahet në Aman të Jordanisë.
Përmes një postimi në profilin e saj në “Facebook”, ajo ka bërë me dije se ajo po qëndron në Aman, ku po merr pjesë në Këshillin e Grave Liderë të Botës, anëtare e së cilës ajo është që nga viti 2012.
“Sot mora pjesë ne hapjen zyrtare të Samitit Global të Grave në Parlamente “Gratë në Politikë: Perspektiva në të ardhmen”, që po mbahet në Aman të Jordanisë në Parlamentin e Mbretërisë Hashimite të Jordanisë. Samiti është duke u organizuar nën patronatin e Mbretit të Mbretërisë Hashimite, Lartmadhërisë së tij, Mbretit Abdullah. Këtë vit ky Samit organizohet me mbështetjen e Parlamentit të Jordanisë, me organizatën për bashkëpunim dhe zhvillim ekonomik si dhe Këshillin e Grave Lidere të Botës, në të cilin jam anëtare që nga viti 2012”, ka shkruar ish-presidentja Jahjaga në “Facebook”.