Jahjaga e dekoroi Rubin me medaljen presidenciale të meritave

Presidentja e Republikës së Kosovës, Atifete Jahjaga, deklaroi se ndihma e SHBA-së për Kosovën është jetike dhe mbështetja për proceset demokratike jo vetëm në Kosovë por edhe për gjithë rajonin e Evropës Juglindore është e nevojshme, sepse garanton paqen dhe stabilitetin.

Ajo i bëri këto komente në takim ish-ndihmës sekretarin e Shtetit të SHBA-së për marrëdhënie me publikun, zotëri James Rubin. Presidentja Jahjaga e falënderoi zotëri Rubin për angazhim dhe kontributin e tij të jashtëzakonshëm për Kosovën gjatë periudhës së luftës që ndihmoi në vendosjen e paqes dhe lirisë dhe të zhvillimit të vendit për të gjithë qytetarët e tij, si dhe pas luftës në ndërtimin e shtetit të Kosovës dhe konsolidimin ndërkombëtar të tij

Presidentja Jahjaga në nderim për kontributin, veprimtarinë dhe angazhimin në afirmimin e çështjes së Kosovës, e dekoroi zotëri James Rubin me Medaljen Presidenciale të Meritave.

Ish-ndihmës sekretari i shtetit i SHBA-së, zotëri James Rubin, e falënderoi Presidenten për mikëpritjen dhe për medaljen e dhënë. Ai tha se Kosova ka shënuar një përparim të madh ndër vite dhe ajo po tregohet si një rrëfim i suksesit të përbashkët.