Jacobson thirrje liderëve për formimin e institucioneve

Thirrjet për formimin e institucioneve në Kosovë po vazhdojnë të bëhen kudo nga ndërkombëtarët. Madje edhe ambasadorja e SHBA-ve në Kosovë, Tracy Ann Jacobson tha sot se udhëheqësit e Kosovës duhet t’i lënë anash dallimet e tyre politike dhe t’i formojnë institucionet sa më shpejtë që është e mundur. Siç thotë ajo, vetëm në këtë mënyrë mund të lëvizet përpara me çështjet e tjera të Kosovës.

Këto komente, Jacobson i bëri në ceremoninë e shënimit të javës për të drejtat e viktimave të krimit.

“SHBA-të mbesin të përkushtuara që të punojnë me Kosovën sikurse edhe me shtetet tjera në rajon, përfshirë edhe në legjislacionin për viktimat e krimit, por për ta bërë këtë na duhet Kuvendi, na duhet Qeveria, prandaj i nxis udhëheqësit e Kosovës që t’i lënë anash dallimet e tyre politike dhe t’i formojnë institucionet e tyre sa më shpejt që është e mundur në mënyrë që të lëvizet përpara me këtë dhe çështje të tjera të agjendës së Kosovës”, tha Jacobson.

E për viktimat e krimit, Jacobson tha se e të gjithë pa marrë parasysh prej nga vijnë,e ndjejnë peshën e krimit në një mënyrë apo tjetër.

Ajo tha se institucionet shtetërore të Kosovë janë qelës për arritjen e cakut për të ndihmuar viktimat e krimit. Jacobson përmendi, rastin në Ferizaj ku është hapur një strehimore e re për viktimat e dhunës në familje e cila punon ditë e natë dhe iu ofron ushqim, veshmbathje dhe këshillim me mbështetjen e SHBA-ve.

Kurse, ministri i Drejtësisë, Hajredin Kuçi tha se kodi penal i Kosovës parasheh mundësi të qartë për mbrojtjen e viktimave dhe mundësi për lehtësimin e atyre viktimave që mund të jenë viktima të krimit gjatë trajtimit në gjyqësi apo hetuesi.

“Janë tre faktor që duhet t’i përgëzojmë sot, është Prokuroria e Shtetit, janë Policia e Kosovës dhe Gjykatat e Kosovës. Natyrisht prokuroria e shtetit ka rritur kapacitetet me zyrën për mbrojtjen e viktimave anë e kënd Kosovës që duhet t’i mbështesim me tutje. Por unë besoj se janë edhe tre faktor që duhet t’i ndihmojmë edhe më shumë në këtë drejtim. E para janë mediat, tentojmë që viktimat e krimit t’i trajtojnë si pjesë të viktimave, cilësdo pjesë të shoqërisë, po ashtu tentojmë që ata të kthehen dhe të rehabilitohen në shoqëri. e Dyta janë institucionet, nuk mjafto vetëm prokuroria, policia dhe gjyqësia, por duhet edhe institucionet tjera të punojnë në ndalimin, në veçanti e kam fjalën për shkollat dhe e treta në familjet tona”, tha Kuçi.

Ndërsa, kryeprokurori Sylë Hoxha tha se mbrojtja e viktimave të krimit do të jetë udhërrëfyes i gjithë sistemit prokurorial në Kosovë.

“Sensibilizimi i publikut me të drejtat e viktimave të krimit, përveç obligimit tonë moral e njerëzor është edhe përgjegjësi ligjore e të gjithë neve. ky obligim me së miri përshkruhet me moton një javë vetëdijesim dhe 365 ditë shërbim. Vetëdijesimi i publikut me të drejtat e viktimave të krimit është punë dhe obligim i përditshëm dhe i përbashkët. Vetëdijesimi pa dyshim se është prej obligimeve tona, por mbrojtja dhe përkrahja e të drejtave të viktimave t krimit është mision dhe vlerë që duhet të zbatohet në praktikë çdo ditë”, ka thënë ai.

Ndërsa, Kryetari i këshillit Gjyqësor të Kosovës, Enver Peci, tha se pjesa më e madhe dhe e ndjeshme gjyqësisë është i dëmtuari, apo viktima e krimit.

Në fund një mirënjohje i është dhënë edhe ish kryeprokurorit të shtetit Ismet Kabashi.