Ja çfarë thotë Luta për nominimin e Arbër Ismajlit, kandidat i LDK-së për kryetar të komunës!

Kryetari i Lidhjes Demokratike të Kosovës (LDK), Dega në Gjilan, Lutfi Haziri – Luta, ka thënë se pas një procesi të kujdesshëm të konsultimeve me Kryesinë e Degës së LDK-së në Gjilan, kanë marrë vendimin që, Arbër Ismajli, të jetë kandidati  i LDK-së për kryetar të Komunës së Gjilanit, në zgjedhjet e ardhshme lokale.

“Ky është një vendim që vjen si rezultat i një besimi të ndërsjellë dhe vlerësimi të thellë për punën, përkushtimin dhe vizionin që Arbëri ka dëshmuar gjatë viteve, veçanërisht si nënkryetar i Komunës, por edhe si një aktivist i palodhur i LDK-së për tri dekada”, ka thënë Haziri, transmeton 2LONLINE.com.

Ai ka bërë me dije se Arbër Ismajli është pjesë e gjeneratës së dytë të Lidhjes Demokratike të Kosovës, gjeneratë e artë e kësaj familje politike.

“E njoh Arbërin prej dekadash, është njeri i përgatitur, i qetë në vendimmarrje dhe i guximshëm në veprim. Është miku im dhe bashkëpunëtori i ditëve të mira e të rënda. Ka treguar se di të dëgjojë qytetarët dhe t’i shërbejë interesit publik me përulësi e profesionalizëm. Nominimi i tij është vendim i përbashkët i imi dhe i Kryesisë së Degës sonë në Gjilan, si shprehje e bindjes sonë se ai do të dijë ta udhëheqë Gjilanin me dinjitet, me përkushtim dhe me dashuri për qytetin”, ka thënë tutje Haziri.

Ai e ka uruar përzemërsisht Ismajlin duke i dëshiruar sukses në këtë rrugëtim.

“Gjilani ka nevojë për energjinë, përvojën dhe vizionin që ai e përfaqëson”, ka thënë në fund Lutfi Haziri, kreu i LDK-së së Gjilanit, njëherësh nënkryetar në nivel qendror. /2LONLINE/