Isufi: Mustafa t’i ketë në kontroll ministrat

Nënkryetari i AAK-së, Ahmet Isufi mendon se Lista Serbe nuk duhet të jetë pjesë e qeverisë, nëse nuk i përgjigjet Kushtetutës dhe Ligjeve të Kosovës.

Isufi ka thënë se kryeministri Isa Mustafa duhet t’i ketë nën kontroll ministrat e tij, në mënyrë që ata të punojnë konfrom ligjeve të Kosovës dhe jo të veprojnë me urdhra të Beogradit.

“Ne konsiderojmë se të gjithë ata që marrin pjesë në Qeverinë e Kosovës duhet t’i përgjigjen Kushtetutës dhe Ligjeve në fuqi. Ndërsa, të gjithë ata që janë kundër këtij orientimi dhe që i përgjigjen politikës së Beogradit, nuk duhet të jenë pjesë e Qeverisë. Kryeministri Mustafa duhet t’i thërrasë ministrat e tij dhe që të gjithë duhet t’i ketë në raport me Kushtetutën dhe Ligjet e Kosovës, dhe jo t’i përgjigjen një shteti tjetër, duke e kundërshtuar shtetin në të cilin kanë garuar në zgjedhje”, ka thënë Isufi për “Politiko.net”.

Lista Serbe ka ngrirë pjesëmarrjen e saj në Qeverinë dhe Kuvendin e Kosovës, pas vendimit të Kryeministrit Isa Mustafa për ta shkarkuar Aleksandër Jabllanoviqin nga posti i Ministrit për Kthim dhe Komunitete.

Ajo do të vendosë nëse do të jetë pjesë e institucioneve të Kosovës, vetëm pas takimit më 9 shkurt, në Bruksel, mes Kryeministrave Isa Mustafa dhe Aleksandër Vuçiqit.
Sipas Ahmet Isufit, kjo tregon se politika e Qeverisë serbe po ndërhyn në punët e brendshme të Kosovës.

“Kjo dëshmon se politika e Beogradit po ndërhyn në territorin e Kosovës përmes përfaqësuesve të zgjedhur brenda Kosovës. Kjo nuk duhet të tolerohet më tutje”, është shprehur Isufi.