Isufi: Drejtoria e Bujqësisë po vazhdon mbështetjen e fermerëve me farë misri e pleh artificial

“Me që misri vlerësohet si njëra ndër kulturat jashtëzakonisht të rëndësishme për ekonominë e vendit, atëherë edhe Komuna e Gjilanit po vazhdon mbështetjen e fermerëve me këtë kulturë”, thotë drejtori për Bujqësi, Bajram Isufi.

AI bëri me dije se duke u bazuar në planin e punës për këtë vit, kanë shpallur thirrje për aplikim për farë misri dhe pleh artificial.

Isufi tregoi se të drejtë aplikimi kanë të gjithë fermerët e komunës, të cilët janë kultivues të misrit. Derisa përparësi kanë ata që jetojnë në fshatra. Sipërfaqja e planifikuar duhet të jetë nga 0.20 hektarë deri në 0.98 hektarë.

Aplikimi ka nisur nga 21 marsi dhe mbyllet më 9 prill.

“Prioritet ndër prioritete e kemi prodhimin foragjer, me theks të veçantë prodhimin dhe kultivimin e misrit, si njëra prej kulturave jashtëzakonisht të rëndësishme për ekonominë e vendit”, tha Bajram Isufi.

Drejtori i Bujqësisë, shtoi se janë njëra ndër komunat e vetme që e subvencionojnë farën e misrit në nivel të republikës.

Sipas tij në vitin paraprak (2024) kanë përfituar 638 fermerë 1000 thasë farë misri dhe 2000 thasë pleh artificial.  /2LONLINE/