Ismajli: Mbi 15 mijë vota janë dëshmi e besimit, e shpresës dhe e guximit për ta ndryshuar bashkë të ardhmen e qytetit tonë

Në garën për kryetar të Komunës së Gjilanit në balotazh do të shkojnë Alban Hyseni i Lëvizjes Vetëvendosjes dhe Arbër Ismajli i LDK-së, e ky i fundit ka falenderuar qytetarët për përkrahje.

“Sipas rezultateve përfundimtare të KQZ-së, dua t’ju shpreh mirënjohjen më të thellë për përkrahjen tuaj të jashtëzakonshme. Mbi 15 mijë vota janë dëshmi e besimit, e shpresës dhe e guximit për ta ndryshuar bashkë të ardhmen e qytetit tonë”, ka thënë Arbër Ismajli.

Ai tha se e falenderon secilin qytetar që besoi, që u angazhua dhe që kontribuoi në këtë rrugëtim.

“Faleminderit me zemër edhe diasporës sonë, që edhe këtë herë e dëshmoi dashninë dhe lidhjen e fortë me Gjilanin, duke qenë gjithmonë pjesë e zhvillimit e përparimit tonë”, thotë tutje Ismajli.

Sipas tij, kjo është vetëm nisma e përbashkët për një Gjilan më të drejtë, më të bashkuar e më të zhvilluar.

“Një nismë që do të vazhdojë me përkushtim e me vizion të qartë për të ardhmen tonë të përbashkët. Bashkë e nisim ndryshimin për Gjilanin e ri! Bashkë e bëjmë Gjilanin qytet të shpresës për të gjithë ju”, thotë Arbër Ismajli, kandidati i LDK-së për kryetar të komunës së Gjilanit.  /2LONLINE/