Ismajli: Gastronomët do të përkrahen sepse përmes tyre përkrahet zhvillimi ekonomik, turizmi, kultura e argëtimit dhe vetë qyteti ynë

Nënkryetari i Lidhjes Demokratike të Kosovës (LDK), Dega në Gjilan, Arbër Ismajli, i cili njëherësh është edhe kandidat i këtij subjekti për kryetar komune, në zgjedhjet e 12 tetorit, ka thënë se gastronomët tanë kanë kaluar sfida të mëdha që nga pandemia që i goditi rëndë, e deri te politikat jo të favorshme të qeverisjes aktuale, prandaj është koha të sigurohet një qasje më e drejtë ndaj tyre.

“Duhet të ketë një orar pune të qëndrueshëm e të pandryshueshëm, që të mos dëmtohet kjo kategori që gjeneron ekonomi dhe vende pune për qindra familje. Të krijohet një rregullore e balancuar për ndotjen akustike, që të jetë në favor të gastronomëve, por edhe të qytetarëve për t’u siguruar që lokalet të funksionojnë lirisht, ndërsa qytetarët të kenë qetësinë e tyre”, ka thënë Ismajli, transmeton 2LONLINE.com.

Sipas tij, Gjilani ka një rini dhe qytetarë që kanë nevojë për argëtim, relaks dhe hapësira të lira kulturore e sociale, e gastronomia është pjesë e rëndësishme e kësaj jete.

“Është koha vendimtare që gastronomët të përkrahen fuqishëm, sepse përmes tyre përkrahet zhvillimi ekonomik, turizmi, kultura e argëtimit dhe vetë qyteti ynë”, thotë Arbër Ismajli, i cili në zgjedhjet e 12 tetorit, synon postin e të parit të komunës duke qenë kandidat i LDK-së për kryetar komune.  /2LONLINE/.