Isha dëshmitar, jo i dyshuar

/2L ONLINE/ – “Përpjekjet që të më nxjerrin në publik si një i dyshuar që po hetohet tani nga prokuroria janë me qëllime tendencioze. Kurrë në jetën time nuk jam intervistuar si i dyshuar, por si dëshmitar”. Kështu ka thënë Drejtori i Urbanizimit të Komunës së Gjilanit, Valon Shefkiu.

Për asnjë rast tani së fundi nuk kam qenë në prokurori. Por, ai kujton se muaj më parë ka qenë i ftuar nga një prokuror, edhe atë jo nga kryeprokurori Jetish Maloku, dhe se në atë rast ka qenë në cilësinë e një dëshmitari, ku është intervistuar për çështjet që kanë pas të bëjnë për periudhën 2012-2013.

Në atë kohë Shefkiu thotë se ka qenë shef i sektorit të ndërtimit në kuadër të Drejtorisë së Inspeksionit, bile që tani nuk ekziston më si drejtori, prandaj i quan befasuese dhe qëllim këqija se gjoja ai qenka intervistuar në prokurori nën dyshimin se ka kryer veprën penale të shpërdorimit të pozitës zyrtare ku dyshohet se ka bërë lëshimin e lejeve të ndërtimit duke mospërfillur asnjë kriter dhe duke bërë anashkalimin e procedurave.

Ai thotë se në 2014 ka marrë postin e drejtorit të Drejtorisë së Urbanizmit, Planifikimit dhe Mbrojtje të Mjedisit. Ndërsa, për periudhën që është intervistuar në cilësinë e dëshmitarit, prokuroria është interesuar për çështje që kanë të bëjnë me periudhën 2012-2013.

“Unë jam intervistuar nga prokuroria e Gjilanit si dëshmitar, e jo si i akuzuar dhe jam pyetur rreth ndërtimeve dhe specifikave që ka ky sektor. Më kanë pyetur për procedurat e inspeksionit dhe për rrënimet që nuk janë kryer nga ish-qeverisja. Dua ta ritheksoj se jam i gatshëm gjithmonë të bashkëpunoj me organet e drejtësisë në çdo kohë sepse jam institucionalist dhe i besoj institucioneve të drejtësisë për ndërtimin e të cilave u sakrifikuan breza të tërë”, ka thënë Valon Shefkiu, drejtor i Drejtorisë së Urbanizmit, Planifikimit dhe Mbrojtjes së Mjedisit. /2L ONLINE/