IPK: Aksion vullnetar për dhurimin e gjakut

Zyrtarët e Inspektoratit Policor të Kosovës dhuruan gjak në kuadër të aktiviteteve për shënimin e 20-vjetorit të IPK-së.  Dhuro gjak – shpëto jetë.

Në kuadër të aktiviteteve të organizuara me rastin e shënimit të 20-vjetorit të themelimit të Inspektoratit Policor të Kosovës (IPK), zyrtarët e IPK-së sot kanë realizuar një aksion vullnetar për dhurimin e gjakut, në bashkëpunim me Qendrën Kombëtare të Kosovës për Transfuzionin e Gjakut.

Kësaj nisme humanitare iu përgjigjën një numër i madh i zyrtarëve të IPK-së të cilët me këtë rast kontribuuan në sigurimin e rezervave të gjakut për qytetarët në nevojë.

Ky aktivitet është pjesë e agjendës së aktiviteteve të Javës së IPK-së, e cila organizohet në shenjë të dy dekadave të punës së institucionit në përmbushjen e mandatit ligjor me fokus në promovimin e integritetit, përgjegjësisë, llogaridhënies dhe shërbimit ndaj qytetarëve.

Përmes këtij aktiviteti, zyrtarët e IPK-së dëshmuan se përkushtimi i tyre nuk kufizohet vetëm në detyrat profesionale, por shtrihet edhe në veprime humanitare për qytetarët në nevojë.

Inspektorati Policor i Kosovës shpreh mirënjohjen dhe falënderimin e veçantë për të gjithë zyrtarët e IPK-së që iu përgjigjën thirrjes për dhurimin e gjakut dhe stafin profesional të Qendrës Kombëtare të Transfuzionit të Gjakut për bashkëpunimin dhe angazhimin e tyre në realizimin me sukses të këtij aktiviteti humanitar, thuhet në njoftimin e IPK-së.  /2LONLINE/