Investim në shëndetësi: Vijojnë punimet në ambulantën e re të Uglarit
Punimet në ambulantën e re të fshatit Uglar po vijojnë, ndërsa për ecurinë e tyre është informuar nga afër Drejtoresha e Drejtorisë për Shëndetësi dhe Mirëqenie Sociale në Komunën e Gjilanit, Mimoza Kadriu Qerimi.
Gjatë vizitës, e shoqëruar nga zëvendësdrejtoresha e QKMF-së, Dr. Merrushe Haziri, drejtoresha Kadriu Qerimi ka parë nga afër progresin e punimeve dhe zhvillimin e investimit në këtë objekt shëndetësor.
Ajo ka theksuar rëndësinë e investimeve në infrastrukturën shëndetësore, veçanërisht në funksion të krijimit të kushteve më të mira për qytetarët dhe ofrimit të shërbimeve më pranë komunitetit.
“Investimi në infrastrukturën shëndetësore është një hap i rëndësishëm drejt përmirësimit të kushteve për ofrimin e shërbimeve shëndetësore dhe lehtësimit të qasjes së qytetarëve në shërbime cilësore, sa më afër vendbanimit të tyre”, ka deklaruar drejtoresha Kadriu Qerimi. /2LONLINE/