Intervistohen kandidatët për Komitetin Konsultativ të Ekspertëve

/2L ONLINE/ – Komisioni i Kuvendit të Komunës, që përbërja e tyre reflekton nga përfaqësimi politik në Kuvend dhe nga shoqëria Civile, ka përfunduar intervistat për përzgjedhjen e anëtarëve të Komitetit Konsultativ të Ekspertëve, duke përgatitur listën prej shtatë anëtarësh të cilët do t’i propozohen kuvendit për miratim.

Komiteti Konsultativ i Eksperteve të Planifikimit Hapësinor, paraqet një trupë të jashtme të Kuvendit të Komunës e cila është një lidhje e mirë e qytetarit me Komunën në përgjithësi, nga fusha e planifikimit.

Me këtë rast kryetari i komisionit Abdyl Aliu, ka thënë se Kuvendi i Komunës ka zhvilluar të gjitha procedurat e parapara duke respektuar ligjet në fuqi të Republikës së Kosovës dhe vendimet e Kuvendit Komunal.

”Menjëherë pas marrjes së vendimit për themelimin e Komitetit Konsulltativ të Ekspertëve të Planifikimit Hapësinor si dhe vendimit për shpallje të konkursit për anëtarësim në këtë komitet, Kuvendi Komunal procedoj më tutje në seancën e radhës me nxjerrjen e vendimit për themelimin e panelit – komisionit për përzgjedhjen e anëtarëve të këtij komiteti. Paneli, ka mbajtur dy takime, në takimin e parë është bërë intervistomi, ndërsa sot janë bërë vlerësimet dhe paneli propozon listën me 7 anëtarët”, ka thënë Aliu.

Ai ka thënë se të gjitha procedurat janë përfillur, sikur që të gjithë anëtarët e komisionit kanë vlerësuar në mënyrë të pavarur dhe në fund rekomandimi për Kuvendin Komunal është me konsensus të plotë të anëtarëve të komisionit.

Ndryshe, detyrat dhe përgjegjësit e këtij Komiteti janë në dhënien e mendimeve, propozimeve, vërejtjeve në dokumentet e planifikimit hapësinorë që miratohen nga Kuvendi i Komunës, pastaj ofron këshilla profesionale, shqyrton dhe propozon zgjidhje, kujdeset për procedurat si dhe monitoron zbatimin e planeve dhe dokumenteve të tjera të miratuara nga Kuvendi Komunal./2L ONLINE/