Intensifikohen inspektimet për ndërtimet pa leje dhe mbrojtjen e mjedisit

Kryetari i Komunës së Kamenicës, Kadri Rahimaj, ka zhvilluar takim me drejtorin e Shërbimeve Publike, Zotrim Kastrati, shefin e Inspektoratit, Liridon Beqiraj, si dhe inspektorët Ibrahim Kastrati, Enver Ismajli dhe Besim Morina. Në takim është diskutuar zbatimi i Planit Operativ për Inspektime me fokus në dy fusha kryesore: identifikimin dhe trajtimin e ndërtimeve pa leje, veçanërisht të shtëpizave malore, si dhe parandalimin e ndotjes së mjedisit nga bizneset dhe personat fizikë.

Kryetari Rahimaj ka kërkuar zbatimin e plotë dhe në përpikëri të Planit Operativ, duke theksuar nevojën për intensifikimin e kontrolleve në terren dhe identifikimin e rasteve të ndërtimeve pa leje. Për ndërtuesit do të kërkohet që të ndërmarrin hapat e nevojshëm për pajisje me leje ndërsa në rast të mosrespektimit të kërkesave ligjore do të ndërmerren masat përkatëse përfshirë edhe gjobitjen në pajtim me legjislacionin në fuqi.

Vëmendje e veçantë do t’i kushtohet edhe mbrojtjes së mjedisit. Inspektorët do të monitorojnë bizneset dhe personat fizikë që shkaktojnë ndotje duke i informuar dhe paralajmëruar për respektimin e rregullave dhe standardeve mjedisore. Në rast të mosrespektimit do të ndërmerren masat ndëshkuese të përcaktuara me ligj.

Gjithashtu do të monitorohen edhe furnitorët e jashtëm që furnizojnë bizneset në territorin e Komunës së Kamenicës me qëllim të respektimit të rregulloreve komunale përfshirë ato që lidhen me taksat dhe detyrimet përkatëse.

Drejtori i Shërbimeve Publike, Zotrim Kastrati, së bashku me shefin e Inspektoratit, Liridon Beqiraj, dhe inspektorët e tjerë janë pajtuar që të intensifikojnë angazhimin në terren dhe të zbatojnë me përpikëri Planin Operativ për Inspektime në këto dy fusha.

Komuna e Kamenicës u bën thirrje të gjithë qytetarëve dhe bizneseve që të tregojnë kujdes dhe përgjegjësi të shtuar ndaj mjedisit, hapësirave publike dhe respektimit të rregullave për ndërtim. Vetëdijesimi dhe bashkëpunimi i qytetarëve janë thelbësorë për krijimin e një ambienti më të pastër, më të sigurt dhe të rregullt për të gjithë. /2LONLINE/