Inspektorati ka shqiptuar gjobë për hedhjen e mbeturinave inerte në shtratin e lumit në Koretin

Inspektorati Komunal i Komunës së Kamenicës ka shqiptuar gjobë në vlerë prej 500 eurosh ndaj një personi/pronar biznesi, për hedhjen e mbeturinave inerte në shtratin e lumit në fshatin Koretin.

Pas ankesave të banorëve dhe thirrjes së Policisë së Kosovës, inspektorët komunalë kanë dalë në vendin e ngjarjes, ku kanë konstatuar hedhjen e mbeturinave në kundërshtim me dispozitat ligjore në fuqi.

Për këtë shkelje është shqiptuar gjoba në vlerë prej 500 eurosh, ndërsa personit përgjegjës i është kërkuar që të bëjë pagesën brenda afatit të përcaktuar ligjor.

“Komuna e Kamenicës nuk do të tolerojë veprime të tilla që dëmtojnë mjedisin, ndotin hapësirat publike dhe rrezikojnë mirëqenien e qytetarëve. Apelojmë te të gjithë qytetarët që të tregojnë përgjegjësi ndaj mjedisit dhe të mos hedhin mbeturina në lumenj, hapësira publike apo në vende të papërshtatshme. Çdo shkelje e evidentuar do të trajtohet në përputhje me legjislacionin në fuqi. Ruajtja e mjedisit është përgjegjësi e përbashkët”, thuhet në njoftimin e Komunës së Kamenicës.   /2LONLINE/