Inaugurohet këndi i leximit dhe kabineti i logopedisë në ShFMU “Sadri Misini” në Shipashnicë

Në ambientet e ShFMU “Sadri Misini” në Shipashnicë të Komunës së Kamenicës, u bë inaugurimi i këndit të integruar të leximit dhe kabinetit të logopedisë, një projekt me rëndësi për zhvillimin arsimor dhe mbështetjen e nxënësve.

Ky projekt u inicua nga BAnZA dhe Premtim Fazliu ndërsa u financua nga organizata Humanity First, me qëllim krijimin e hapësirave moderne dhe funksionale për përmirësimin e shkathtësive të leximit dhe ofrimin e shërbimeve profesionale të logopedisë për nxënësit.

Në ceremoninë e inaugurimit mori pjesë Drejtori i Arsimit, Selami Klaiqi, së bashku me stafin e kësaj drejtorie, përfaqësues te inicimit dhe te financimit te projektit. Me këtë rast, drejtori i shkollës, Ismet Lakna, bëri prerjen simbolike të shiritit, duke shënuar zyrtarisht funksionalizimin e këtyre hapësirave të reja në shërbim të nxënësve.

Drejtori i Drejtorisë së Arsimit, Selami Klaiqi, theksoi se projekte të tilla janë jetike për ngritjen e cilësisë në arsim, duke shtuar se investimet në hapësira edukative dhe mbështetëse ndikojnë drejtpërdrejt në zhvillimin gjithëpërfshirës të nxënësve dhe në krijimin e mundësive të barabarta për të gjithë.

Ai falënderoi organizatën Humanity First dhe iniciatorin e projektit për bashkëpunimin dhe kontributin e dhënë në përmirësimin e kushteve në institucionet arsimore. /2LONLINE/