DYLON

IHMK: Përditësim i parashikimit të motit (18–20 nëntor 2026)

IHMK: Përditësim i parashikimit të motit (18–20 nëntor 2026)
Redaksia

PËRMBLEDHJE METEOROLOGJIKE

Pas parashikimit të publikuar të dielën për javën në vazhdim, Instituti Hidrometeorologjik i Kosovës (IHMK), bazuar në analizën e të dhënave të reja të modeleve meteorologjike dhe monitorimin e parametrave meteorologjikë në rrjetin shtetëror të stacioneve, sjell përditësimin e parashikimit të motit për periudhën 18–20 nëntor 2026.

EkoHigjiena

Moti pritet të mbetet relativisht i ngrohtë për këtë periudhë të vitit, ndërsa rënia graduale e presionit atmosferik do të ndikojë në shtimin e paqëndrueshmërisë atmosferike. Dita e enjte parashihet të karakterizohet nga erëra të forta, kryesisht nga drejtimi jugor dhe jugperëndimor.

E mërkurë, 18 nëntor 2026

Parashihet të mbajë mot relativisht i ngrohtë, me vranësira të cilat do të shtohen gradualisht gjatë ditës. Nuk përjashtohet mundësia e reshjeve shumë të lehta të shiut, me sasi nën 1 mm.

Temperaturat: Në orët e mëngjesit pritet të jenë rreth 9°C, ndërsa maksimalet e ditës do të arrijnë deri në 16°C.

Era: Do të fryjë erë e dobët deri mesatare, me tendencë të forcimit gjatë orëve të mbrëmjes.

Presioni atmosferik: Pritet të shënojë rënie graduale nga rreth 1010 hPa në 1002–1005 hPa, duke sinjalizuar afrimin e një sistemi atmosferik më të paqëndrueshëm.

E enjte, 19 nëntor 2026

Parashihet të mbajë mot i ndryshueshëm, kryesisht i vranët, me reshje të lehta shiu dhe intervale me ndërprerje. Kjo ditë pritet të karakterizohet nga paqëndrueshmëria më e theksuar atmosferike, veçanërisht nga erërat e forta.

Temperaturat: Temperaturat maksimale do të lëvizin nga 15°C deri në 18°C, vlera relativisht të larta për këtë periudhë të nëntorit.

Era: Do të fryjë erë e fortë nga drejtimi jugor dhe jugperëndimor, me shpejtësi 30–45 km/h, ndërsa gjatë rafaleve mund të arrijë shpejtësi edhe më të larta. Intensiteti më i madh i erës pritet nga mesdita deri në orët e mbrëmjes.

Reshjet: Parashihen reshje të lehta shiu, me sasi që lokalisht mund të arrijnë rreth 1 mm brenda tri orëve.

Presioni atmosferik: Pritet të zbresë deri në rreth 999 hPa. Në orët e vona të ditës parashihet kalimi i një fronti atmosferik, i cili do të ndikojë në ndryshimin e drejtimit të erës.

Kujdes: Për shkak të erërave të forta, qytetarët këshillohen të sigurojnë objektet e lehta në hapësirat e jashtme. Kujdes i veçantë rekomandohet për tabelat reklamuese, skelat e ndërtimit dhe gjatë qarkullimit rrugor, sidomos në hapësira të hapura.

E premte, 20 nëntor 2026

Pas kalimit të frontit atmosferik, parashihet përmirësim gradual i kushteve meteorologjike. Moti pritet të jetë kryesisht i thatë, me kthjellime dhe vranësira të shpërndara.

Temperaturat: Temperaturat minimale do të lëvizin rreth 8–9°C, ndërsa maksimalet e ditës pritet të arrijnë deri në 17°C.

Era: Do të fryjë nga drejtimi verior dhe veriperëndimor, fillimisht me intensitet më të lartë, ndërsa gjatë ditës pritet të dobësohet gradualisht.

Presioni atmosferik: Pritet të shënojë rritje graduale, duke arritur vlera rreth 1008–1011 hPa.

TENDENCA E MOTIT PËR DITËT NË VIJIM

Nga dita e shtunë parashihet rënie graduale e temperaturave, me vlera maksimale rreth 9–11°C. Moti pritet të mbetet kryesisht i thatë, me mundësi për reshje të lehta lokale gjatë orëve të vona.

REKOMANDIME PËR QYTETARËT

Të enjten rekomandohet kujdes i shtuar për shkak të erërave të forta, veçanërisht në hapësira të hapura.

Siguroni objektet e lehta në ballkone, oborre dhe hapësira të tjera të jashtme.

Drejtuesit e automjeteve këshillohen të tregojnë kujdes të shtuar gjatë qarkullimit, sidomos në rrugë të ekspozuara ndaj erës.

Për shkak të ndryshimeve të temperaturave ndërmjet mëngjesit dhe ditës, rekomandohet veshje e përshtatshme.

Qytetarët këshillohen të ndjekin njoftimet dhe përditësimet e radhës nga IHMK.

Instituti Hidrometeorologjik i Kosovës (IHMK)

Privatësia

Kjo faqe interneti përdor cookie në mënyrë që t'ju ofrojmë përvojën më të mirë të mundshme si përdorues. Informacioni i cookie-ve ruhet në shfletuesin tuaj dhe kryen funksione të tilla si njohja juaj kur ktheheni në faqen tonë, si dhe ndihmon ekipin tonë të kuptojë se cilat seksione të faqes ju duken më interesante dhe më të dobishme.